我覺得自家製的煉奶比街賣的,牛奶味道更香濃及滑。 而且今次我用上北海道鮮奶煮,煮出自家製北海道煉奶,味道及信心當然更有保障啦!
材料:
北海道鮮奶 300g
砂糖 80g
做法:
先用中火把鮮奶和砂糖煲滾。
改用細火及不停攪動慢慢煮。
煮至大概15分鐘後,小心留意奶漿濃度。
取起1小匙奶漿,再滴回入鍋中作測試。
如發覺最後1滴很慢才滴落,而奶漿泡沬又不停滾起,就可以熄火。
熄火後,它的溫度仍很高,所以也要繼續攪動至它的泡沬完全靜止。
要即入樽,因放涼後很杰,很難倒入樽中。
放涼後要放入雪櫃保存。
小提示:
煮煉奶與煮焦糖做法差不多,但一定要用最細火煮及要不停作測試。
因為煮時容易滾瀉,所以煮時煲不要蓋蓋。
一般要煮大概20至25分鐘。
它會十分容易煲燶,所以第一次不要煮太多。
它的顏色應該同一般煉奶顏色相似,如煮成淺啡色,下次要煮短些時間。
放入雪櫃後煉奶會變得更杰。
用玻璃樽保存煉奶較好。
亦可用微波爐把它慢慢叮至杰成煉奶,但用爐煮應較健康些。
嘩, 好似好得意喎, 等我今晚都試吓試先, 唔知用奶粉得唔得呢?
你可以用奶粉加水代替鮮奶,但用鮮奶味道較佳。
請問可以保存幾耐?
試過保存10日也無問題,放太耐就未試過。